चिपळूण : पुणे येथील रोटरी क्लब पुणे साऊथ यांच्या
नुकत्याच (१४ जून) संपन्न झालेल्या साप्ताहिक सभेत येथील पर्यटन
अभ्यासक धीरज वाटेकर यांनी पॉवरपॉईंट सादरीकरणाद्वारे उपस्थितांना अपरिचित कोकणची
सफर घडविली. सफारीचा आनंद घेतलेल्या
अनेकांनी कोकणातील माहित नसलेल्या अनेक निसर्ग स्थळांविषयी आणि वेगळेपणाविषयी
पहिल्यांदाच माहिती मिळाल्याचे यावेळी आवर्जून नमूद केले.
७८ पॉवरपॉईंट स्लाईड्सद्वारे तासभर चाललेल्या या
कार्यक्रमाची सुरुवात वाटेकर यांनी श्रावण कृष्ण त्रयोदशी या कोकण क्षेत्र
निर्मिती दिनापासून केली. यानंतर त्यांनी कोकणातील निसर्गास्थाने अंतर्गत
सात धबधब्यांचे एकत्रित स्थान असलेले लिंगाचा डोंगर (आंगवली-मार्लेश्वर),ग्लोबल चिपळूण टुरिझम चा महत्वाकांक्षी
उपक्रम असलेला ‘वशिष्ठी उगम ते संगम’ उपक्रम अंतर्गत संपूर्ण वशिष्ठी नदी, साहित्यात प्रसिद्ध तुंबाड, इतिहासप्रसिद्ध दाभोळ
आदींची माहिती सांगितली. तिलारी-दोडामार्ग-खडपडे-कुंभवडे-चौकुळ-आंबोलीचे जैवविविधतेने
परिपूर्ण निसर्ग वैभव अनुभवण्यासाठी प्रसिद्ध असलेल्या पर्यटन पॉईंटच्या पलिकडे
जाऊन विचार करून नेचर ट्रेल करण्याचे आवाहन केले. यावेळी त्यांनी ३६५ दिवस आंबोली ही संकल्पनाही
विषद केली.पोलादपूर तालुक्यातील कुडपण
गावी असलेला महाराष्ट्रातील ६८ पैकी एक असलेला रौद्रभीषण निसर्गनवल ८०० फुट उंचीचा
भीमाची काठी सुळका,कोकणातील प्राचीन घाट रचनांची ओळख करून देणारा तिवरे ते
मालदेव व्हाया बैलमारव घाट, कुंभे निजामपूर बोगदा परिसर निसर्ग आदी माहिती
दिली.
कोकणातील ठाणे-पालघर, रायगड, रत्नागिरी, सिंधुदुर्ग येथील
सागरकिनारे, हेदवीची समुद्रघळ मालवण आणि रत्नागिरी येथील
स्कुबा डायव्हिंग, त्सुनामी आयलंड (मालवण), कोकणातील खाडी किनाऱ्यावर असलेले वैशिष्ट्यपूर्ण
किनारी आणि सागरी दुर्ग, १६६१ ला छत्रपती शिवाजी महाराजांनीघनदाट अरण्यात
गनिमी कावा तंत्राचा अवलंब करून कारतलबखानाच्या नेतृत्वाखालील मुघल सैन्याचा पराभव
केलेली या उंबरखिंड, कोकणातील कोकणात ६४ नद्यांच्या खोऱ्यात असलेल्या
४२ रमणीय खाड्या, कोकण आणि देश याना जोडणारे घाट रस्ते, धबधबे, पाऊस, सडा : कोकणातील एक
वैशिष्ट्यपूर्ण परिसंस्था, कमळतळी, तळ कोकणातील १०१ धरणे, कोकणातील संग्रहालये, प्राचीन विहिरी, मानवी संस्कृतीचं मूळ शोधण्याचा
प्रयत्न करणारीकातळशिल्पे, कोकणातील जलमंदिरे, गुहा मंदिरे, देवराया, दगडी पार, पोर्तुगीज घंटा, वारूळ देवता, किमान हजार वर्षेपूर्व
मूर्तीकला, लाकडावरील कोरीव काम, जल संचयन पद्धती, कोकणी श्रद्धा, कोकणातील अष्टविनायक, बारव, दर्गे-मशीद, पारंपरिक मासेमारी, सागरी महामार्गाचे सौंदर्य, अश्मयुगकालीन गुहा, जंगलातील दुभंगलेल्या
मूर्ती, मिठागरे, हेरीटेज होम, कोकणातील उत्सव, कोकणातील माणसे, इथली वाचनालये आणि
माध्यमांची परंपरा आदी कोकणातील अपरिचित मुद्यांचा उहापोह वाटेकर यांनी आपल्या
सादरीकरणात केला.
कार्यक्रमाची रूपरेषा रोटरी क्लब ऑफ पुणे साऊथचेअध्यक्ष
सुदर्शन नातू यांनी उपस्थितांसमोर मांडली. क्लब प्रोग्राम कमिटीचे प्रमुख मंदार
पूर्णपात्रे यांनी परिचय करून दिला. आभार संदीप यांनी मानले.
आपण ही सफर https://fb.watch/67fgm5lqMq/ या फेसबुक लिंकवर जाऊन प्रत्यक्ष अनुभवू शकता.
कोणत्याही टिप्पण्‍या नाहीत:
टिप्पणी पोस्ट करा